Kuri uyu wa 22 Gicurasi , Ishyaka PDI ryashyikirije Komisiyo y’Igihugu y’Amatora urutonde rw’abakandida 55 ryifuza ko bazarihagararira mu matora ku mwanya w’Abadepite, muri Nyakanga 2024.
Ibyangombwa byatanzwe na Visi Perezida wa Kabiri wa PDI, Amb. Harerimana Fatou, aherekejwe na bamwe mu barwanashyaka barimo Senateri Murangwa Hadidja unahagarariye itsinda rishinzwe ibikorwa byo kwiyamamaza muri PDI.
Mu byangombwa bisabwa umutwe wa Politiki harimo ibaruwa yandikirwa Perezida wa Komisiyo y’Igihugu y’Amatora itanga lisiti y’Abakandida, Lisiti y’Abakandida n’amadosiye yabo, ikimenyetso cy’umutwe wa Politiki gishyirwa ku rupapuro rw’itora, ikimenyetso cy’ububasha uhagarariye umutwe wa Politiki yahawe n’ibindi.
NEC itangaza ko urutonde ntakuka rw’abakandida bemejwe ruzatangazwa ku wa 14 Kamena 2024.
