Kuri uyu wa 21 Gicurasi Umwarimu usanzwe wigisha mu Rwunge rw’Amashuri rwa Butete ruherereye mu Karere ka Burera, Nyiramahirwe Jeanne d’Arc, yashyikirije Komisiyo y’Igihugu y’Amatora (NEC) kandidatire ye ku mwanya w’Abadepite mu cyiciro cy’Abagore.
Nyiramahirwe Jeanne d’Arc mu gitondo yafashe moto yerekeza ku biro bya Komisiyo y’Amatora gutanga kandidatire ye.
Nyuma yo gutanga kandidatire ye yagaragaje ko yiteguye kwegukana umwanya mu badepite 24 b’abagore, kandi ko afite icyizere cy’uko azabasha kuzuza inshingano kuko yabaye mu myanya itandukanye y’inzego z’ibanze.
Ati: “Nzabishobora, kuko nabibayemo mpagarariye urubyiruko, nabaye no mu nama Njyanama y’Akarere ka Burera, urumva ko ku bijyanye n’umurongo n’icyerekezo by’igihugu ndi tayali, niyo mpamvu nshaka kugira ngo umusanzu wanjye ube wakomereza mu badepite.”
Ni mu gihe biteganyijwe ko ku wa 29 Kamena 2024, aribwo hazatangazwa lisiti y’itora ntakuka, ndetse ku wa 14 Nyakanga hakaba amatora ku Banyarwanda baba mu mahanga, naho ku wa 15 Nyakanga 2024 hakaba amatora imbere mu gihugu.
NEC kandi iteganya ko kuva ku wa 22 Kamena kugeza 13 Nyakanga 2024 hazatangira ibikorwa byo kwiyamamaza.
