Ku wa 27 Nyakanga 2024 , Polisi ya Nigeria yatangaje ko yamaze guta muri yombi abantu 4 barimo n’umupasiteri bakekwaho kugurisha uruhinja rw’amezi 2.
Umuvugizi wa polisi i Lagos SP Benjamin Hundeyin, yatangaje ko abashinzwe iperereza kuri sitasiyo ya Oko-oba bamaze guta muri yombi abakekwa ndetse ko iperereza rigikomeje.
Amakuru aravuga ko umwe mu bakoze ubwo bujura yaje agafata umwana nyina atabizi, hanyuma akamujyana ahantu hatazwi mu rwego rwo kumugurisha rwihishwa nk’uko byaje gutahurwa n’abakoze iperereza. Icyo gihe hari tariki 11 Nyakanga 2024.
Umwe mu bakekwa kugira uruhare muri ubu bujura witwa Gloria ndetse anemera ko yagurishije umwana amafaranga yaho ibihumbi 500. Yanemeje ko uwo yamugurushijeho ari Pasiteri Peter.
Pasiteri Peter na we yaje gufatirwa mu mujyi wa Ikenne aho yasobanuye ko umwana yamugurishije akabakaba miliyoni 1.4. Pasiteri yahise avuga ko uwitwa Loretta ari we wamuguze. Bidatinze uyu Loretta yahise atabwa muri yombi anemera ko yamutanze bakamuha asaga miliyoni 2.3.
Mu baguze uyu mwana banyuma bakekwa harimo uwitwa James na madamu we bafatiwe mu birori byo kwita izina uyu mwana bivugwa ko baguze magendu.
Biteganyijwe ko abatawe muri yombi bose baza kugezwa imbere y’ubutabera bakanaburanishwa nyuma y’iperereza rigikomeje gukorwa.
