Minisitiri w’Ingabo muri Israel, Katz Israel yatangaje ko yategetse igisirikare cy’iki gihugu kubura ibitero kuri Iran, nyuma yo kuyishinja kutubahiriza agahenge kashyizweho.
Ni icyemezo Minisitiri Katz Israel yatangaje kuri uyu wa Kabiri tariki 24 Kamena 2025. Yavuze ko Iran yarashe ibibasu bya missiles muri Israel, kandi impande zombi zari zemeranyije guhagarika imirwano.
Ibi birego Iran yabihakanye.
Ibijyanye n’agahenge hagati ya Israel na Iran byatangajwe bwa mbere na Perezida wa Leta Zunze Ubumwe za Amerika, Donald Trump mu gitondo cyo kuri uyu wa Kabiri.
Iran na Israel mu masaha yakurikiyeho byatangaje ko byiteguye kubahiriza aka gahenge.
Minisitiri w’Ububanyi n’Amahanga wa Iran, Abbas Araghch, yavuze ko igihugu cye cyahagaritse kugaba ibitero kuri Israel kuva mu rukerera rwo kuri uyu wa Kabiri.
Ati “Iran yakunze kubisubiramo idaca ku ruhande, Israel yashoje intambara kuri Iran, ntabwo ari twe twayishoje. Kugeza ubu nta masezerano ahari ajyanye n’agahenge cyangwa guhagarika ibikorwa bya gisirikare, ariko mu gihe Israel yahagarika ubushotoranyi bwayo ku baturage ba Iran bitarenze Saa 4:00 ku isaha y’i Tehran, nta gahunda dufite yo gukomeza gusubiza nyuma y’aho.”
Israel yo yavuze ko “yemeye agahenge kasabwe nyuma yo kugera ku ntego z’ibitero kuri Iran.”
Amakuru yashyizwe hanze na Trump, yavuze ko aka gahenge kagena ko Iran igomba guhagarika ibitero ihereye Saa 6:00 zo kuri uyu wa Kabiri, Israel na yo igakurikiraho mu gihe kitarenze amasaha 12, gusa nyuma y’amasaha make yongeye gutangaza ko aka gahenge katangiye kubahirizwa n’impande zombi.
