RSSB Tigers BBC yegukanye igikombe cya Super Cup nyuma yo gutsinda APR BBC amanota 78 kuri 68 mu mukino wabereye muri BK Arena.
Ni umukino wabaye ku wa Gatanu, tariki ya 6 Gashyantare 2026, RSSB Tigers BBC yegukana igikombe cya FERWABA Super Cup 2026 nyuma yo gutsinda APR BBC amanota 78-68 mu mukino w’ishiraniro wabereye muri BK Arena.
Uyu mukino wari utegerejwe cyane kuko wahuje APR BBC yegukanye Igikombe cya Shampiyona 2024-2025 na RSSB Tigers BBC yegukanye Rwanda Cup 2025. Tigers yagaragaje imbaraga zikomeye ku bakinnyi bashya yaguze, aho yatangiye umukino neza itsinda agace ka mbere ku manota 25-22.
Mu gace ka kabiri, amakipe yombi yanganyije amanota 22-22, ariko Tigers ikomeza kuyobora umukino ifite amanota 47-44. Agace ka gatatu, Tigers yongeye imbaraga mu busatirizi no mu kugarira, itsinda APR BBC ku manota 69-54. Nubwo APR BBC yagerageje kugaruka mu gace ka kane nyuma itsinda ku manota 14-9, ntibyaba bihagije kuko umukino warangiye Tigers itsinze 78-68.
Mu cyiciro cy’abagore, igikombe cya Super Cup cyegukanywe na APR WBBC itsinda REG WBBC ku manota 75-62. REG WBBC yari yihariye ibikombe byose umwaka ushize, bityo guhura na APR WBBC ku mukino wa nyuma byari bitegerejwe cyane.
Shampiyona ya Basketball mu Rwanda ya 2026 iteganyijwe gutangira ku Cyumweru, tariki ya 8 Gashyantare 2026.
