Perezida Paul Kagame yahuye na mugenzi we Faustin Archange Touadéra wa Repubulika ya Centrafrique, bagirana ibiganiro byagarutse ku mikoranire irimo inkunga itangwa n’u Rwanda mu by’umutekano binyuze mu ngabo zarwo ziri butumwa bwa Loni (MINUSCA) muri kiriya gihugu.
Ni ibiganiro byabaye ku mugoroba wo kuri iki Cyumweru tariki 23 Ugushyingo 2025, nk’uko byatangajwe n’Ibiro by’umukuru w’Igihugu cy’u Rwanda.
Perezida Kagame na Perezida Touadéra banasuzumye amahirwe mashya yo gukomeza kwagura ubufatanye mu nzego zitandukanye zishobora guteza imbere abaturage b’ibihugu byombi.
Ibi biganiro byibanze ku guteza imbere umutekano, ubucuruzi, guteza imbere imiyoborere myiza no kongerera imbaraga imishinga y’iterambere rusange.
Uruzinduko rwa Perezida Touadéra rufungura imiryango mishya y’imikoranire, rukaba ruzafasha gukomeza gushimangira umubano mwiza umaze igihe hagati ya Centrafrique n’u Rwanda.
U Rwanda rwatangiye kohereza ingabo muri Repubulika ya Centrafrique mu mwaka wa 2014, mu butumwa bw’amahoro bw’Umuryango w’Abibumbye bita MINUSCA.
Guhera ubwo, rwakomeje kohereza ingabo n’abapolisi binyuze mu butumwa bwa Loni n’amasezerano yashyiriweho n’ibihugu byombi kugira ngo bibungabunge amahoro n’umutekano muri icyo Gihugu.
Ingabo z’u Rwanda zagize uruhare rukomeye mu kubungabunga amahoro muri Repubulika ya Centrafrique, zishimirwa na benshi muri kiri Gihugu, zinazwi mu kurindira umutekano abayobozi bakuru
