Umuyobozi w’Ikirenga wa Qatar, Sheikh Tamim bin Hamad Al Thani, yagennye Mansour Ali Fahad Al-Shahwani Al-Hajri nk’Ambasaderi mushya w’icyo gihugu mu Rwanda. Igenwa rye ryemejwe na Minisiteri y’Ububanyi n’Amahanga ya Qatar mu butumwa yasohoye ku rubuga rwayo rwa X, nubwo ryabaye ku wa 19 Ugushyingo 2024.
Mansour Ali Fahad Al-Shahwani Al-Hajri yari asanzwe akorera muri dipolomasi ya Qatar nka Chargé d’Affaires muri Ambasade y’icyo gihugu i Guangzhou mu Bushinwa. Aje gusimbura Misfer bin Faisal Mubarak Al-Ajab Al-Shahwani, witabye Imana muri Nyakanga 2024.
Icyemezo cyo gushyiraho uyu Ambasaderi mushya kibaye hashize iminsi mike Emir wa Qatar avuye mu ruzinduko rwe i Kigali, aho yakiriwe na Perezida Paul Kagame ndetse akagirana na we ibiganiro byagutse ku bufatanye bw’ibihugu byombi.
Mu butumwa yanyujije ku rubuga rwe rwa X nyuma y’uruzinduko rwe, Emir Sheikh Tamim yagize ati “Qatar n’u Rwanda bihujwe n’umubano ukomeye ugenda ukura, kandi utera imbere byihuse ugana ku rwego rutanga icyizere rw’ubufatanye n’inyungu zihuriweho”.
Yanashimiye Perezida Kagame ku ruhare rwe mu kuzamura amahoro mu karere k’ibiyaga bigari, agaragaza ko ashima imbaraga u Rwanda rukomeje gushyira mu bikorwa bigamije umutekano n’ubufatanye bw’akarere
