Abanyarwanda barenga 200 bari bamaze imyaka barahungiye muri Repubulika Iharanira Demukarasi ya Congo, batahutse kuri uyu wa Mbere, bavuga ko Umutwe w’iterabwoba wa FDLR wari warabafashe bugwate ubabwira ko uzabacyura mu Rwanda numara gukuraho ubuyobozi bwarwo.
Aba baturage bageze mu Rwanda saa tanu z’amanywa, banyuze ku mupaka wa La Corniche uhuza umujyi wa Rubavu na Goma. Bakigera ku butaka bw’u Rwanda, bakiriwe n’Umuyobozi Mukuru w’Ishami ry’Umuryango w’Abibumbye ryita ku Mpunzi (UNHCR), Ritu Shrof, wari kumwe n’Umuyobozi w’Akarere ka Rubavu, Mulindwa Prosper.
Nyuma yo guhabwa ikaze, bahise boherezwa mu nkambi ya Nyarushishi iherereye mu Karere ka Rusizi, aho hakirirwa abatahuka baturutse muri Congo. Ni ahantu hamaze igihe hifashishwa mu kwakira no gutunganya ubuzima bushya bw’abagaruka mu gihugu nyuma yo gutahuka ku bushake bwabo.
Aba baturage bagomba guhabwa ubufasha bw’ibanze burimo ibyo kurya bingana na Frw 45 ku munsi, n’amafaranga abafasha gutangira ubuzima bushya. Urengeje imyaka 18 ahabwa $188 naho uri munsi yayo agahabwa $113.
Iki gikorwa cyo kwakira abatahuka gikurikije imyanzuro yafatiwe mu nama yahuje u Rwanda, RDC na UNHCR yabereye i Addis Abeba ku wa 24 Nyakanga 2025, yahurizaga hamwe uburyo bwo gufasha gutaha ku bushake abanyarwanda bari muri Congo.
Minisiteri y’Ibikorwa by’Ubutabazi yerekana ko kugeza ubu abarenga 6000 bamaze gutahuka ku bushake kuva mu ntangiriro z’uyu mwaka.
