Ikipe ya Rayon Sports yashyizwe ku rutonde rw’amakipe atemerewe kwandikisha abakinnyi muri Afurika.
Ni urutonde rwagiye hanze kuri uyu wa Kabiri tariki 11 Ugushyingo 2025, aho Rayon Sports nayo yisanze ku mwanya wa kabiri muri aya makipe nyuma yo kuregwa n’abarimo Roberto Goncalves do Carmo wayitoje umwaka ushize batarishyura.
Impuzamashyirahamwe y’umupira w’amaguru ku isi ,FIFA, iheruka kohereza ibarawa Rayon Sports iyimenyesha ko igomba kwishyura Robertihno angana n’ibihumbi 22,5 y’Amadorari ubwo ni arenga milliyoni 30 z’amafaranga y’u Rwanda.
Iyi kipe kugeza ubu ntabwo irishyura uyu mutoza ndetse ari nacyo cyatumye iza ku rutonde rw’amakipe atemerewe kwandikisha abakinnyi. Ibi bivuze ko ubu Rayon Sports ishatse kongeramo umukinnyi muri aba baba nta kipe bafite ntabwo byakunda kereka nibanza kwishyura Robertihno.
Rayon Sports irimo kurwana n’ikibazo cy’ubushobozi kugeza ubu nubwo abakinnyi bamaze guhembwa umushahara w’Ukwezi kwa 10 ariko iyi kipe iracyafite ibindi irimo kurwana nabyo birimo no hanze y’ikibuga.
Andi makipe yahawe ibihano arimo Nyasa Big Bullets, KenGold SC, TS Galaxy FC, Township Rollers, AS Arta Solar7, Welkite Kenema FC, Coton Sport de Garoua, Pretoria Callies, SCCM, Ismaily SC, Enyimba FC, Club Sportif Sfaxien na Zamalek SC.
Ikipe ya Rayon Sports iri ku mwanya wa 2 wa shampiyona y’u Rwanda ku rutonde rw’agateganyo. Iyi kipe iheruka gutsindwa na APR FC ibitego 3-0 mu mukino w’umunsi wa Karindwi wa shampiyona.

