Inteko Ishinga Amategeko ya Peru yatoye umwanzuro utegeka ko Perezida wa Mexique Claudia Sheinbaum atemerewe gukandagira ku butaka bw’iki gihugu azira ko igihugu cye cyemereye ubuhungiro uwari Minisitiri w’Intebe Betssy Chavez.
Guverinoma ya Peru yatangaje ko Mexique yahaye Chavez ubuhungiro mu buryo bunyuranyije n’amategeko mpuzamahanga, ariko Mexique ibitera utwatsi.
Chavez ashinjwa kuba mu mugambi umwe na Perezida Pedro Castillo ushinjwa byo gushaka gusesa inteko ishinga amategeko. Ubushinjacyaha bumusabira gufungwa imyaka 25.
Umubano utari mwiza hagati ya Peru na Mexique warushijeho kujya irudubi ubwo Mexique yahaga ubuhungiro umugore n’abana ba Pedro Castillo wari Perezida wa Peru ubu wakuwe ku butegetsi akaba anafunzwe.
Minisitiri w’Ububanyi n’Amahanga wa Peru Hugo de Zela yavuze ko abahanga mu mategeko babo bari gusuzuma umwanzuro Mexique yashingiyeho itanga ubuhungiro.
Peru ivuga ko yaciye umubano na Mexique kubera ibikorwa ikora bibangamiye ubufatanye bw’impande zombi.
Chavez utemera ibyaha aregwa yari yafunzwe muri Kamena 2023 ariko afungurwa muri Nzeri 2025 ngo yitegure kuburana ari hanze.
