Perezida Donald Trump yohereje abandi basirikari ibihumbi 2 mu mujyi wa Los Angeles, ahakomeje kubera imyigaragambyo y’abaturage bamagana gufatwa no gutabwa muri yombi ku bimukira badafite ibyangombwa.
Ni imyigaragambyo yakajije umurego ku wa Gatanu no ku wa Gatandatu, aho abaturage bamagana uburyo igikorwa cyo gufata no gufunga abimukira badafite ibyangombwa kiri gukorwamo, bagaragaza ko kirengagiza amahame y’uburenganzira bwa muntu.
Ku rundi ruhande, bamwe mu bigaragambya bafitanye isano n’abimukira bafashwe, aho bari gushyirwa mu bigo byabugenewe, mu gihe hashakishwa uburyo basubira mu bihugu byakomotsemo.
Abigaragambya bahanganye n’inzego z’umutekano bakoresheje amabuye ndetse batwika imodoka, mu gihe nazo zabamishemo imyuka iryana mu maso.
Tumwe mu duce turimo abigaragambya nka Paramount, dutuyemo abarenga 80% abaturage bafite inkomoko mu bihugu nka Mexique n’ibindi, ari nabo bashinjwa kuzana bene wabo badafite ibyangombwa, bakabacumbikira.
Guverineri wa California, Gavin Newsom, yagiranye ikiganiro cy’iminota 40 na Donald Trump, mbere y’uko atangaza ko icyemezo cyo kohereza ingabo mu guhangana n’abigaragambya kitari gikwiriye.
Kugeza ubu abagera ku 118 bamaze gutabwa muri yombi. Guverinoma ya Trump yihaye intego yo kujya ita muri yombi abimukira batagira ibyangombwa bagera ku 3000 ku munsi umwe.
