Umunya-Esipanye ukina muri FC Barcelona, Lamine Yamal, yemeje ko agiye kwandika amateka mashya.
Ni mu kiganiro yagiranye n’itangazamakuru ku munsi wejo hashize tariki 16 Nyakanga 2025, ubwo yatangazwaga nk’umukinnyi ugiye kwambara nimero 10 nyuma yo gusohoka muri FC Barcelona kwa Ansu Fati wambaraga iyi nimero.
Lamine, abajijwe kuri Lionel Messi, Ronaldinho ndetse n’abandi bambaye iyi nimero muri FC Barcelaona, yatangaje ko ari abanyabigwi ariko agiye kwandika amateka ye.
Yagize ati “ Lionel Messi na Ronaldinho, ni abanyabigwi ariko ngiye kwandika amateka yanjye.”
Uyu musore yakomeje avuga ko FC Barcelona ari ikipe y’ubuzima bwe ndetse ko yiteguye gukomeza gutsinda.
Yagize ati “ Byari inzozi kuva nkiri muto, kandi ndanezerewe cyane hamwe n’umuryango wanjye wose. zari inzozi zanjye.
Iyi niyo kipe y’ubuzima bwanjye. Maze imyaka 7 hano kuva muri La Masia, ni mu rugo. Kugera mu ikipe nkuru uvuye muri La Masia ni inzozi, ndikuzikabya kandi nkomeje gukora.”
Lamine Yamal wujuje imyaka 18, yatangaje ko gutsinda ari byo agiye gushyiraho umutima muri iyi myaka iri imbere.
Yagize ati “ Gutsinda ni buri gihe. Ngiye gukomeza kwishima ari hejuru ya byose ni ugutsinda. Ku bafana, mu byukuri ngiye gukomeza kujya imbere kandi nzishimira gukinira kuri Sitade nshya. Tuzishima birenze, ndetse tuzatsinda nta gushidikanya.”
Lamine Yamal aheruka gutangaza ko agiye guhereza ikipe ya FC Barcelona, UEFA Champions League ndetse ko ategereje igikombe cy’isi cya 2026, nacyo ngo ashaka kugitwarana na Esipanye.
