Ishami rya ONU ryita ku bana ryatangaje ko “ribabajwe kandi rishenguwe n’urupfu rwa mugenzi wacu Karine Buisset” wiciwe mu gitero cya drone mu nzu “y’abakozi bafasha” i Goma muri DR Congo.
UNICEF ivuga ko Karine yari umukozi wo mu butabazi “ukorana umuhate no kutananirwa mu gufasha abana n’imiryango” yagizweho ingaruka n’intambara.
M23 ishinja igisirikare cya leta ko ari cyo cyakoze iki gitero cya ‘drone’ cyahitanye abantu batatu barimo Karine Buisset.
Abajijwe kuri ibi birego, umuvigizi w’igisirikare cya DR Congo ntiyabihakanye cyangwa ngo abyemere.
Leta ya Kinshasa na yo nta cyo iravuga ku gitero cyahitanye uwo mukozi wa UNICEF.
Bertrand Bisimwa, umwe mu bakuru b’umutwe wa M23, yatangaje ko barebeye ku kwegerana kw’aharashwe n’ahari ingo z’abakuru ba politike b’uyu mutwe “abari bagambiriwe” n’icyo gitero ari Joseph Kabila wahoze ari perezida wa DR Congo na Corneille Nangaa ukuriye AFC/M23.
