Umugaba Mukuru w’Ingabo za Mozambique (CGS), General Júlio dos Santos Jane, ari kumwe na Major General André Rafael Mahunguane uyobora Ingabo z’Igihugu, ku wa Kane tariki 30 Ukwakira, basuye Ingabo z’u Rwanda ziri mu bikorwa byo kubungabunga umutekano (RSF) mu Mujyi wa Mocímboa da Praia, mu Ntara ya Cabo Delgado.
Bakiriwe n’Umugaba Mukuru w’Ingabo z’u Rwanda ziri muri Mozambique, Major General V. Gatama, hamwe n’abandi bayobozi bakuru ba RSF, babagezaho uko umutekano uhagaze muri ako gace basanzwe bashinzwe kurindamo.
Nk’uko byatangajwe na Minisiteri y’Ingabo z’u Rwanda, intego y’uru ruzinduko yari ugusuhuza Ingabo z’u Rwanda ziherutse koherezwa muri Cabo Delgado ziyobowe na Major General V. Gatama, wasimbuye bagenzi be bari basanzwe bahakorera.
Uruzinduko rwari rugamije kandi gushimangira umubano n’ubufatanye bwa gisirikare umaze igihe hagati y’Ingabo z’ibihugu byombi.
Mu ruzinduko rwe, General Jane yatangaje ko **Ikigo cy’Ububanyi n’Ubuyobozi bw’Ibikorwa bya Gisirikare bihuriweho** (Joint Command and Coordination Centre) kigiye kwimurirwa mu Mujyi wa Mocímboa da Praia kivuye i Pemba, kugira ngo byorohereze igenamigambi n’imikoranire y’ibikorwa bizaza.
Yashimye Ingabo zombi — iz’u Rwanda n’iza Mozambique — ku buryo zikomeje gufatanya mu kurangiza neza inshingano zazo.
General Jane yongeye kwizeza ko azakomeza gushyigikira izi ngabo zihuriye hamwe mu kurangiza neza ubutumwa zahawe.
Yanashimye cyane imbaraga n’ubwitange byagaragajwe n’Ingabo z’u Rwanda (RSF) n’iza Mozambique mu kurwanya iterabwoba muri Cabo Delgado, anashimira RSF ku ruhare runini yagize mu kugarura amahoro n’umutekano muri iyo ntara.
