Polisi ya Uganda yatangaje ko inkuba yakubise impunzi 14 abandi 34 bagakomereka mu nkambi ya Palabek iri mu majyaruguru y’iki gihugu aho zari zagiye gusenga mu materaniro yo ku mugoroba wo ku wa gatandatu tariki 02 Ugushyingo 2024.
Mu itangazo yanyujije ku rubuga nkoranyambaga rwa X polisi y’iki gihugu yatangaje ko abandi bishwe n’inkuba bafite hagati y’imyaka icyenda na 18.
Umuvugizi w’igipolisi cya Uganda Kituuma Rusoke, yatangaje ko uwo muntu mukuru uri mu bishwe n’inkuba ku wa gatandatu yari umugabo w’imyaka 21.
Ishami ry’Umuryango w’Abibumbye ryita ku mpunzi (UNHCR) rivuga ko inkambi y’impunzi ya Palabek icumbikiye impunzi n’abasaba ubuhungiro bose hamwe barenga 80,000. Benshi baturuka muri Sudani y’Epfo ihana imbibi na Uganda.
Mu myaka ine ishize, inkuba yishe abana 10 mu mujyi wa Arua, na wo wo mu majyaruguru ashyira uburengerazuba bwa Uganda.
Icyo gihe abo bana bakubiswe n’iyo nkuba ubwo bari babaye bafashe akaruhuko, mu mukino w’umupira w’amaguru wabahuzaga.
