Abasirikari bagera 15 baguye mu mirwano yahanganishije igisirikari cya Tchad na Boko Haram, abandi 36 barakomereka, ku wa gatandatu w’icyumweru gishize.
Ibi byemejwe n’umuvugizi w’igisirikari cya Tchad Issakh Acheikh ku wa 10 Ugushyingo. Yavuze ko ku ruhande rwa Boko Haram, abarwanyi bayo 96 aribo baguye muri iyi mirwano abandi 11 barakomereka, hafatwa intwaro n’ibindi bikoresho.
Yijeje abaturage ko ibintu biri mu maboko y’igisirikare kandi ko ibikorwa byo gukurikirana abarwanyi basigaye bikomeje.
Ibiro Ntaramakuru by’Abafaransa, AFP bitangaza ko amakuru byahawe n’igisirikare avuga ko iyi mirwano yabereye ku kirwa cya Karia, mu majyaruguru y’uburengerazuba bw’akarere ka Lac Chad.
