Kuri uyu wa 3 Ugushyingo 2025 Perezida watorewe kuyobora Tanzania Samia Suluhu Hassan agiye kurahirira mu muhezo kongera kuyobora iki gihugu.
Uyu muhango urabera mu ngoro y’umukuru w’igihugu ndetse ntamuturage wemerewe kuhagera nyuma y’imyigaragambyo imaze iminsi yo kwanga amatora hari ubwoba ko hakongera kuvuka imvururu .
Aba baturage basabaga ko abanyapolitiki batavuga rumwe n’ubutegetsi babujijwe guhatana na Perezida Samia, nka Tundu Lissu w’ishyaka CHADEMA, bafungurwa, amatora agasubirwamo, na bo bakemererwa kuyitabira.
Tariki ya 1 Ugushyingo, CHADEMA yatangarije ibiro Ntaramakuru AFP ko kugeza uwo munsi, abantu batari munsi ya 800 bari bamaze gupfira mu myigaragambyo. Ishami ry’Umuryango w’Abibumbye rishinzwe uburenganzira bw’ikiremwamuntu ryo ryagaragaje ko abapfuye bagera ku 10.
Komisiyo y’Amatora ya Tanzania yatangaje ko Perezida Samia yatsinze ku majwi 97,66%, abakandida 16 bari bahatanye basaranganya atageze kuri 3%. CHADEMA yamaganye ibyavuye mu matora.
Kuva imyigaragambyo yatangira, internet yarafunzwe, abatuye mu Mujyi wa Dar es Salaam basabwa kuguma mu ngo kuva mu masaha y’umugoroba kugeza mu gitondo, amashuri arahagarikwa. Kugeza ubu, abaturage ntibarasubira mu buzima busanzwe.
