Abantu bagera kuri 41 kuri iki Cyumweru baguye mu nkongi y’umuriro yibasiye urusengero mu mujyi wa Cairo mu gihugu cya Misiri.
Hatangiye iperereza ngo hamenyekane intandaro y’uwo muriro.
Umuriro watangiye imihango ya misa irimbanyije mu gace gatuwe cyane mu mujyi wa Cairo, nibura abantu 41 bahasize ubuzima.
Abapfuye ni Abakiristu bo mu idini ryitwa Coptes rifite abayoboke bari hagati ya miliyoni 10 na miliyoni 15 mu zisaga miliyoni 103 zituye Misiri.
Minisiteri y’Ubuzima yatangaje ko abapfuye ari 41 naho abakomeretse ari 14.
Ubuyobozi buvuga ko bwabashije kuzima iyo nkongi yibasiye kiliziya y’ahitwa Abou Sifine mu gace ka Imbaba.
Ubushinjacyaha bwavuze ko bwatangije iperereza rigamije kumenya aho inkongi yaturutse.
Perezida wa Misiri, Abdel Fattah al-Sissi yihanganishije imiryango yabuze abantu babo, ndetse avuga ko yahamagaye kuri telefoni, Tawadros II, Pape wa Kiliziya y’Abakiristu bo mu Misiri.
Itorero Orthodoxe ry’Aba.Copte riyobowe na Papa Tawadros II kuva muri 2012, rifite ijambo muri politiki ya Misiri, ndetse Perezida Abdel Fattah al-Sissi, ni umwe mu Bakuru ba kiriya gihugu witabira Ikoraniro ryabo rya Noheli buri mwaka.
UMUSEKE.RW
