Kuri uyu wa 28 Ukwakira 2024 ikipe y’umupira w’amaguru yo mu Bwongereza, Manchester United, yirukanye uwari umutoza wayo Erik ten Hag wari umaze imyaka ibiri ayitoza.
Mu itangazo ubuyobozi bw’iyi kipe bwashyize ahagaragara bwagize buti: “Erik Ten Hag yavuye ku mirimo ye nk’umutoza mukuru w’ikipe y’abagabo ya Manchester United. Turashimira Erik ku byo yakoze byose mu gihe yamaranye natwe kandi tumwifurije ibyiza ejo hazaza.”
Iri tangazo rikomeza rivuga ko Umuholandi wayikiniye nka rutahizamu Ruud Van Nestelrooy ari we usigarana inshingano zo gutoza ikipe by’agateganyo afashwa n’itsinda rindi ry’abatoza mu gihe hari gushakwa umutoza mukuru.
Erik Ten Hag yashyize umukono ku masezerano amwinjiza muri iyi kipe mu mpeshyi ya 2022 yari ay’imyaka itatu. Byari biteganyijwe ko azarangira mu 2025 ariko yashoboraga kongerwaho umwaka. Mu mpeshyi ya 2024 ni bwo uyu mwaka yawongerewe aho yari kuzasoza amasezerano mu mpeshyi ya 2026, ibi bikaba bitaravuzweho rumwe n’abakunzi b’iyi kipe.
Erik Ten Hag mu myaka ibiri amaranye na Manchester United Asize ayigejeje ku gikombe cya FA Cup 2023-2024.
Yatwaye kandi na EFL Cup/Carabao Cup mu mwaka wa 2022-2023. Muri shampiyona mu mwaka we wa mbere w’imikino wa 2022-2023 Manchester United yabaye iya gatatu n’amanota 75 mu gihe muri 2023-2024 yabaye iya munani, umwanya wa mubi iyi kipe yari igize bwa mbere mu myaka 34 ishize.
