Igisirikare cya Mali cyataye muri yombi abasirikare bagera kuri 20 barimo Général, bakekwaho umugambi wo guhirika ubutegetsi bwa Général Assimi Goïta.
Umwe mu bashinzwe umutekano muri iki gihugu ku wa 10 Kanama 2025 yabwiye ibiro ntaramakuru AFP ati “Kuva mu minsi itatu ishize, hatawe muri yombi abakekwaho gushaka guhungabanya inzego. Hafunzwe abagera kuri 20.”
Mu bafunzwe harimo Général Abass Dembele wabaye Guverineri w’intara ya Mopti. Yafatiwe mu mujyi wa Kati uherereye mu bilometero 15 ujya mu murwa mukuru, Bamako, mu gitondo cyo ku wa 10 Kanama.
Umwe mu bakorana bya hafi na Gen Dembele yagize ati “Abasirikare baje mu gitondo kare, bafatira Général Abass Dembele muri Kati. Ntabwo bamubwiye impamvu bamufashe.”
Umwe mu badepite mu Nteko Ishinga Amategeko ya Mali yatangaje ko abamaze gufatwa bagera kuri 50, kandi ko bose ari abasirikare bari bafite umugambi wo gukuraho ubutegetsi bwa Gen. Goïta.
Gen Goïta ari ku butegetsi kuva mu 2021 ubwo yabukuragaho Baw Ndaw wari Perezida w’inzibacyuho. Uyu musirikare ni na we wayoboye ibikorwa bya gisirikare byo gukuraho Ibrahim Boubacar Keita mu 2020.
