Impuzamashyirahamwe y’Umupira w’Amaguru muri Afurika y’Iburasirazuba no Hagati (CECAFA), yatangaje amakipe 12 azitabira irushanwa rihuza amakipe yo mu Karere ka Afurika yo hagati n’iy’Iburasirazuba, CECAFA Kagame Cup.
Auka Gecheo, Umuyobozi Mukuru wa CECAFA, yatangaje ko irushanwa rizatangira tariki 02-15 Nzeri mu Mujyi wa Dar es Salaam muri Tanzania.
Amakipe azitabira CECAFA Kagame Cup, ni Vipers SC (Uganda), El Merriekh SC Bentiu (South Sudan), Mlandege SC (Zanzibar), Al Hilal (Sudan) na Kenya Police FC (Kenya).
Andi makipe azitabira arimo na Ethiopia Insurance (Ethiopia), MCC FC (Somalia), APR FC (Rwanda), Aigle Noir FC (Burundi), Young Africans SC, Simba SC (Tanzania) na ASAS Djibouti Telecom (Djibouti).
Gecheo yagize ati: “Turateganya ko irushanwa rizaba rikomeye cyane, kuko amakipe menshi azaryifashisha mu kwitegura imikino ya CAF y’umwaka wa 2025/2026.”
Ikipe ya Red Arrows yo muri Zambia ikina muri Zambia Premier League ni yo yegukanye igikombe cya CECAFA Kagame Cup umwaka ushize, nyuma yo gutsinda APR FC yo mu Rwanda ku mukino wa nyuma wabereye kuri sitade ya KMC.
