Ikirunga cyitwa Hayli Gubbi cyo muri Ethiopia cyarutse ku nshuro ya mbere nyuma y’imyaka ibihumbi 12 cyari kimaze gisinziriye.
Iki Ikirunga Hayli Gubbi giherereye mu karere ka Afar mu Majyaruguru y’Uburasirazuba bwa Ethiopie.
Ku Cyumweru ku wa 23 Ugushyingo 2025 nibwo iki kirunga cyari kimaze igihe kinini gisinziriye cyatangiye kuruka, kizamura imyotsi n’ivu mu kirere ku butumburuke bwa kilometero 14 bitwikira ibice bigikikije ndetse kinagira ingaruka ku bahinzi bari mu bikorwa byabo.
Umuyobozi wo muri ako gace, Mohammed, yatangarije AP ko nta bapfuye cyangwa abakomeretse baratangazwa, gusa avuga ko iri ruka ryateje ikibazo ku borozi b’amatungo kuko ivu ryatwikiriye ubwatsi bw’amatungo.
NASA yatangaje ko amashusho ya satellite yerekanye imyotsi yiganjemo ivu ryinshi ryazamukaga mu kirere rikambukiranya Inyanja Itukura.
Toulouse Volcanic Ash Advisory Center, yo yavuze ko iryo vu ryanyuze hejuru ya Yemen, Oman, rigera muri Pakistan no mu Buhinde.
Kubera ubwinshi bw’ivu n’imyotsi by’iki kirunga byatumye ingendo z’indege zisubikwa mu Buhinde.
Kompanyi y’indege ya Air India ibinyujije kuri X, yatangaje ko yahagaritse ingendo zimwe zo mu gihugu n’izindi mpuzamahanga kugira ngo ikore igenzura ry’umutekano ku ndege zanyuze mu bice bimwe nyuma y’iruka rya Hayli Gubbi.
Ikigo cy’iteganyagihe cy’u Buhinde (IMD) cyavuze ko iyi myotsi ishobora kugira ingaruka zikomeye kuko iri kugenda ku butumburuke bwo hejuru, yongeraho ko bishobora no kugera mu burasirazuba mu buryo bwihuse.
Iki kirunga giherereye mu bilometero 800 mu majyaruguru y’Uburasirazuba bwa Addis Ababa hafi y’umupaka wa Eritrea. Gifite ubutumburuke bwa metero 500.
Abashakashatsi bagaragaza ko hataramenyekana igihe cyaherukiraga kuruka, gusa bagashimangira ko hari hashize imyaka ibihumbi 12 gisinziriye.
