Ku cyumweru gishize nibwo umusirikare wa FARDC yinjiye mu rusengero rwitwa “Le Chemin” mu mujyi wa Muanda mu ntara ya Kongo-Central arasa mu bakiristu, yica abantu babiri barimo umugore n’umwana w’amezi ane, undi wa gatatu apfira mu nzira ijya kwa muganga.
Mu rubanza rwabereye mu mujyi wa Muanda, Adjudant chef Médard Katonzi yemeye ko yarashe abakristu bari mu rusengero, gusa ntiyavuze impamvu yabimuteye.
Amashusho yashyizwe ku mbuga nkoranyambaga y’aho byabereye yerekana ababonye ibyabaye bavuga ko uwo musirikare wo mu ngabo zirwanira mu mazi, yinjiye mu rusengero afite imbunda agahagarika amasengesho akababwira ko ashaka uwo yavuze ko ari umugore we.
Mu gihe abuze igisubizo, umwe mu bagore uvuga ko yari ahari, avuga ko uwo musirikare yahise atangira kurasa amasasu menshi muri uru rusengero ruri hafi y’ahazwi nka Banana ku nkengero z’inyanja ya Atlantika mu burengerazuba bwa DR Congo.
Nyuma y’iburanisha ry’ibanze ryabaye ku wa kabiri, urubanza rwa Médard Katonzi ruzakomeza mu mpera z’uku kwezi kwa Gicurasi 2025.
Ubwicanyi nkubu bwagiye buba mu bihe bitandukanye aho mu 2020 umusirikare witwaje intwaro yishe arashe abasivire 12, barimo umwana w’umukobwa w’imyaka ibiri, mu gace ka Sange mu ntara ya Kivu y’Epfo.
Mu 2022 umusirikare wasinze ari mu bwato mu kiyaga Tanganyika mu ntara ya Kivu y’Epfo, yishe abagenzi umunani abarashe, harimo n’abana, mbere y’uko afatwa.
Mu 2023 i Nyakova mu ntara ya Ituri umusirikare yishe arashe abantu bagera kuri 13, barimo abana 10 hamwe n’umugore we nyuma y’uko agarutse iwe agasanga umuhungu we yarapfuye bakamushyingura adahari, nk’uko umuvugizi wa gisirikare waho yabitangaje.
