Abademobe b’i Bubanza bavuga ko babyeho nabi, nta tegeko ribarengera nk’abantu barwaniye igihugu bamwe bagakuramo ubumuga.
Mu ntangiriro z’iki Cyumweru, babwiye Minisitiri w’Ingabo n’abahoze ku rugamba mu Burundi, Ir Tribert Mutabazi ko bafite umutima uhagaze kubera ubuzima bugoye burimo kutagira ubwishingizi mu kwivuza, aho kuba ndetse ko n’ifunguro baricyesha Imana.
Aba bademobe babwiye Minisitiri Ir Tribert Mutabazi ko igihugu barwaniye kiri gutera imbere bo bagasubira inyuma kurushaho.
Hari uwatanze ikibazo avuga ko yakoreye Leta imyaka 36 (1960-1962) ariko yasezererwa agasanga mu kigega cya INSS afitemo amafaranga atarenga 300 FBU.
Gen Maj Emmanuel Miburo uyobora INSS yavuze ko iyo dosiye ayizi ko mu myaka 36 uwo mu Demobe yakoreye igihugu yateganyirijwe imyaka ibiri gusa.
Yagize ati “Nicyo gituma babonye yahawe amafaranga macye, kubera ko babaraga ku mushahara yahembwaga n’ayo bamuteganyirije.”
Abademobe bavuga ko ubwo bajyaga gusezererwa mu gisirikare bigishijwe imyuga babwirwa ko bazahabwa akazi ariko amaso akaba yaraheze mu kirere.
Uyu yagize ati “Igihe twajyaga mu buzima busanzwe, mwatubwiye ko tugiye kubona akazi, Siko biri, turi mu buzima buteye agahinda.”
Basaba ko bafashwa kwiteza imbere ndetse bagahabwa n’ingurane ikanyuzwa mu kigega cy’abahoze ku rugamba.
Minisitiri w’Ingabo n’abahoze ku rugamba, Ir Tribert Mutabazi yababwiye ko muri Gashyantare 2023 hazasohoka itegeko ribagenga nk’abahoze ari abasirikare.
Yabibukije ko ari abaturage nk’abandi badakwiriye kumva ko batandukanye n’abandi barundi kandi ko Minisiteri ayobora irajwe ishinga n’abakiri mu gisirikare.
Ati ” Muri abaturage mu bandi, ni mubane na bo, abana banyu ni nk’abandi bana. Ku byerekeye akazi, abo tureba bwa mbere ni abasirikare bakiri ku kivi.”
Yabasabye kwibumbira mu makoperative kugira ngo bashobore kubona inkunga mu kigega cy’abahoze ku rugamba.
Yagize ati “Mukore mushobore kwitunga, muri abasubijwe mu buzima busanzwe, abarwaye bazavurwa.”
Muri iyo nama abahoze mu gisirikare babwiwe ko “nta deni Leta ibarimo” ryo kuba bararwanye urugamba kandi ko bakwiriye kugana ubuhinzi n’indi mirimo naho ibyo “gutegera amaboko Leta bizabakururira akaga.”
NDEKEZI JOHNSON / UMUSEKE.RW
