Muri Kiyovu Sports hatangiye gukorwa igenzura ry’ikoreshwa ry’umutungo [Audit] mu mwaka ushize w’imikino 2021/2022.
Hashize iminsi havugwa byinshi mu ikipe ya Kiyovu Sports, birimo iby’amikoro, kwegura kwa hato na hato kwa Mvukiyehe Juvénal uyiyobora n’abandi bo muri Komite Nyobozi bivugwa ko bamaze kwegura.
Muri iyi kipe haherutse kuvugwa ibirarane by’imishahara y’abakinnyi, byanatumye bamwe bahanwa nk’abazanye umwuka mubi mu ikipe ndetse bikaviramo ikipe gutsindwa na Sunrise FC ku mukino w’umunsi wa Kane wa shampiyona.
Ubuyobozi bw’Inama y’Ubutegetsi [Board] ya Kiyovu Sports, mu kiganiro bwagiranye na Radio B&B Umwezi bwatangaje ko hari gukorwa igenzura ry’imikoreshereze y’umutungo [Audit], rigamije kumenya uko umutungo w’iyi kipe wakoreshejwe kuva yafatwa na Mvukiyehe Juvénal.
Iri genzura rigamije kwerekana ukuri kuri byinshi bijyanye n’umutungo birimo ayaguzwe abakinnyi, imishahara n’ibindi.
Muri iyi kipe havuzwe abakinnyi bayihenze ubwo bagurwaga, barimo Vuvu Pinoki bivugwa ko yaguzwe miliyoni 90 Frw, ariko aya makuru yashidikanyijweho n’abatari bake.
UMUSEKE.RW
