Kuri uyu wa 13 Gashyantare 2026, abayobozi bo mu ihuriro AFC/M23 n’abo mu butumwa bw’amahoro bw’Umuryango w’Abibumbye muri Repubulika Iharanira Demokarasi ya Congo(MONUSCO) bahuriye mu Mujyi wa Goma mu nama yiga ku iyubahirizwa ry’agahenge.
Ku ruhande rwa AFC/M23, iyi nama yitabiriwe n’Umuyobozi Mukuru wayo, Corneille Nangaa n’abo ku rwego rwa gisirikare barimo ushinzwe ubutasi, Col Nzenze Imani John. Kuri MONUSCO, yitabiriwe n’abarimo Umuyobozi wayo w’agateganyo, Vivian van de Perre.
Vivian yageze mu Mujyi wa Goma mu gitondo cyo ku wa 12 Gashyantare. Indege ye yaguye ku kibuga cy’indege cyaho, biba ubwa mbere gikoreshejwe kuva mu mpera za Mutarama 2025 ubwo ihuriro AFC/M23 ryatangiraga kukigenzura.
Akigera kuri iki kibuga cy’indege, yasobanuye ko agenzwa no kuganira n’abafatanyabikorwa barebwa no kugenzura iyubahirizwa ry’agahenge, atanga icyifuzo cy’uko iki kibuga na cyo cyatangira gukoreshwa mu byiciro.
Akanama ka Loni gashinzwe umutekano kahaye MONUSCO inshingano yo kugenzura iyubahirizwa ry’agahenge mu bice AFC/M23 yavuyemo muri Teritwari ya Uvira. AFC/M23 na Leta ya RDC byarabyemeye ubwo ababihagarariye bahuriraga i Doha muri Qatar.
Umunyamabanga Mukuru wa Loni wungirije ushinzwe ubutumwa bw’amahoro, Jean-Pierre Lacroix, tariki ya 12 Gashyantare yasobanuye ko kohereza ingabo za MONUSCO bizakorwa mu byiciro ariko ko kugira ngo zizere umutekano, zizabanza koherezayo indege z’ubutasi.
Lacroix yagaragaje ko indege z’ubutasi zizoherezwa muri Uvira zizajya zituruka ku kibuga cy’indege cya Goma. Byacaga amarenga ko hashobora kuba ibiganiro bisaba AFC/M23 kugifungura kugira ngo kijye cyifashishwa muri ubu butumwa.
