Inteko rusange y’Abadepite yanze gutora ishingiro ry’umushinga w’itegeko ryerekeye kwemerere abangavu bagejeje imyaka 15 kuboneza urubyaro basaba ibiganiro bihuza inzego zose bireba.
Abadepite mu Nteko Ishinga Amategeko y’u Rwanda banze gutora uyu mushinga ubwo bari mu nteko rusange kuri uyu wa Mbere, aho abadepite 30 batoye umwanzuro wo kudashyigikira uyu mushinga w’itegeko bagasaba kuwunoza.
Uyu mushinga w’itegeko ryerekeye ubuzima bw’imyororokere, ugamije guha uburenganzira abangavu bagejeje ku myaka 15 guhabwa serivise zo kuboneza urubyaro, abadepite 18 gusa nibo bemeye uyu mushinga, barindwi barifata abandi 30 batora “OYA”
Depite Gamariel Mbonimana ukuriye itsinda ry’abadepite batanu batangije uyu mushinga w’itegeko, yasobanuye ko iri tegeko rigamije gukemura ibibazo birimo n’inda ziterwa abangavu, gusa benshi mu Badepite batanze ibitekerezo kuri uyu mushinga bavuze ko ukeneye kongera gutegurwa neza kubera ko abawuteguye bibanze gusa ku gukumira ingaruka z’ikibazo kurusha gukemura ikibazo ubwacyo.
Abadepite bamaze kwanga ishingiro ry’uyu mushinga w’itegeko, Depite Gamariel Mbonimana yavuze ko bagiye kuwigaho neza bakazawugarura imbere y’inteko rusange urimo birenze ku birimo.
Inteko rusange y’Abadepite ikaba yanafashe umwanzuro w’uko habaho ibiganiro ku mpande zombi zirebwa n’iri tegeko, mu rwego rwo kurushaho kurinononsora byimbitse.
Itegeko ryerekeye ubuzima bw’imyororokere mu Rwanda, ubusanzwe ntiryemerera abana bari munsi y’imyaka 18 kuboneza urubyaro kuko ubikeneye asabwa kujyana umubyeyi we amuherekeje.
Umuryango Nyarwanda wita ku Buzima HDI (Health Development Initiative) mu bihe bitandukanye wagiye ugaragaza ko iri tegeko rikumira abangavu, nyamara abangavu batwara inda zitateguwe bakomeje kwiyongere ari nako bituma batakaza uburenganzira bwabo burimo no gucikiriza amashuri.
Ni mu gihe kandi bamwe mu banyarwanda bagiye bagaragaza ko abangavu bemerewe kuboneza urubyaro byafasha mu guhangana n’ikibazo cy’abangavu batwara inda zitateguwe, gusa abandi nabo bagaragaza impungenge ko kubemerera kuboneza urubyaro byaba intandaro yo gukurura ubusambanyi mu rubyiruko.
Imibare ya Minisiteri y’Uburinganire n’Iterambere ry’Umuryango (MIGEPROF) igaragaza ko mu 2021 abangavu ibihumbi 23 batarageza ku myaka 18 aribo batewe inda , ni mu gihe kuva mu 2016 kugera 2021 abangavu 98, 342 bari baratewe inda zitateganyijwe.
NKURUNZIZA Jean Baptiste/ UMUSEKE.RW
Iyo babyemeza byali kuba ali “agahomamunwa” ku gihugu gituwe n’abantu bitwa abakristu kuli 95% nibuze. Ingaruka ya mbere,nuko ubusambanyi bwakiyongera.Nk’abakristu,dukwiye kwirinda ikintu cyose kijyana ku busambanyi.Umuti waba uwuhe?Mu idini nsengeramo,ababyeyi bigisha abana babo ijambo ry’Imana hakiri kare nkuko Imana ibidusaba muli Gutegeka 6:6,7.Ibyo bituma abana bakura bumvira Imana,bikabarinda ubusambanyi no kubyara.Abo bana b’abakobwa mukunda kubabona bali kumwe n’ababyeyi babo bali mu nzira,babwiriza ijambo ry’Imana,nkuko Yesu yabisabye buri mu Kristu nyakuli wese.Nguwo umuti rukumbi w’Abangavu babyara.Ntitukabe abakristu ku izina gusa (nominal Christians).Niyo mpamvu igihugu cyacu n’isi yose bifite ibibazo.Ni ukubera ko abantu batuye isi abenshi ari abakora ibyo Imana itubuza.
Iyo babyemeza byali kuba ali “agahomamunwa” ku gihugu gituwe n’abantu bitwa abakristu kuli 95% nibuze. Ingaruka ya mbere,nuko ubusambanyi bwakiyongera.Nk’abakristu,dukwiye kwirinda ikintu cyose kijyana ku busambanyi.Umuti waba uwuhe?Mu idini nsengeramo,ababyeyi bigisha abana babo ijambo ry’Imana hakiri kare nkuko Imana ibidusaba muli Gutegeka 6:6,7.Ibyo bituma abana bakura bumvira Imana,bikabarinda ubusambanyi no kubyara.Abo bana b’abakobwa mukunda kubabona bali kumwe n’ababyeyi babo bali mu nzira,babwiriza ijambo ry’Imana,nkuko Yesu yabisabye buri mu Kristu nyakuli wese.Nguwo umuti rukumbi w’Abangavu babyara.Ntitukabe abakristu ku izina gusa (nominal Christians).Niyo mpamvu igihugu cyacu n’isi yose bifite ibibazo.Ni ukubera ko abantu batuye isi abenshi ari abakora ibyo Imana itubuza.