Ihuriro ry’abakora muri serivisi z’indege muri Kenya (KAWU) ryatangaje ko abanyamuryango baryo bazongera kwigaragambya guhera tariki ya 25 Werurwe 2026 mu gihe Leta itakemura ibibazo byabo birimo imishahara mito.
Muri Gashyantare, aba bakozi bafashe icyemezo cyo guhagarika akazi bitewe n’uko ikigo gishinzwe ingendo z’indege za gisivili (KCAA) kitari cyakemuye ikibazo cyabo.
Ubwo ingendo z’indege zinyura ku kibuga mpuzamahanga cy’indege cya Jomo Kenyatta zari zimaze amasaha 20 zihagaze, aba bakozi bemeye gusubira mu kazi. Icyo gihe Leta yari yabijeje ko igiye kwiga ku kibazo cyabo kugira ngo igikemure.
Ku wa 18 Werurwe, Umunyamabanga Mukuru wa KAWU, Moses Ndiema, yatangaje ko mu cyumweru gitaha bazasubukura imyigaragambyo kubera ko Leta itarakemura ikibazo cyabo.
Ndiema yamenyesheje abateganya gukora ingendo zo mu kirere zifite aho zihuriye na Nairobi guhera tariki ya 25 Werurwe ko bakwiye kwitegura imbogamizi zishobora kuzabaho, kandi ko badakwiye kubara ikosa ku banyamuryango ba KAWU.
Nk’uko byagenze ubushize, mu gihe hatabaho ibiganiro, sosiyete zikoresha ikibuga cy’indege cya Jomo Kenyatta zishobora kongera guhagarika ingendo zijyayo cyangwa zivayo, zigakoresha ibindi bibuga.
