Imirwano yongeye gufata intera hagati y’ingabo za Leta ya Sudan n’abarwanyi b’Umutwe witwaje intwaro wa RSF aho ku wa 18 Werurwe abarenga 17 bahitanywe nayo mu gihe abarenga 120 bakomeretse.
Ni ibyatangajwe n’umuryango wa MSF ushinzwe ubutabazi no kwita ku mbabare wavuze ko wakiriye inkomere zisaga 123 z’abakomerekeye muri iyo mirwano, aho abarenga 17 bahasize ubuzima mu gihe abandi bakiri kwitabwaho n’abaganga.
Ingabo za Leta ya Sudan zavuze ko abo bantu babuze ubuzima n’abakomeretse bikomeye bagabweho ibitero n’abarwanyi b’umutwe wa RSF, nyuma baje guhangana n’icyo gisirikare cya Sudan, bikarangira umugambi wabo wo gukomeza kugaba ibitero uburijwemo.
Iyi mirwano ikomeje gukaza umurego hagati y’ingabo za Sudan n’abarwanyi b’Umutwe witwaje intwaro wa RSF yatangiye muri Mata mu mwaka wa 2023, kugeza ubu imaze guhitana abarenga ibihumbi 40 nk’uko bitangazwa n’imibare y’Umuryango w’Abibumbye.
Mu gihe iyi ntambara ikomeje gukaza umurego, igihugu cya Tchad gituraniye Sudan cyamaze gufunga umupaka wahuzaga ibyo bihugu byombi mu rwego rwo kwirinda ko iyo mirwano yagera ku butaka bwayo, uretse ko ingabo za Sudan zivuga ko bamwe mu barwanyi ba RSF bakomoka aho muri icyo gihugu cya Tchad.
Imiryango itandukanye irengera ikiremwamuntu ku isi ikomeje gusaba ko habaho ibiganiro hagati y’impande zihanganye mu rwego rwo guhagarika imirwano ikomeje guhitana abasivili, ibintu Leta ya Sudan kugeza ubu idakozwa.
