Umugabo bikekwa ko yakubise mugenzi we agakomereka nyuma bikamuviramo urupfu, ari guhigishwa uruhindu.
UMURYANGO wamenye amakuru ko mu mudugudu wa Kami, mu kagari ka Rurangazi mu murenge wa Nyagisozi mu karere ka Nyanza hari umuntu wasanzwe yapfuye taliki ya 26/10/2025.
Uyu yasanzwe mu nzu yibanagamo wenyine, nyakwigendera yitwa Evarise NZAMURAMBAHO w’imyaka 41.
Umuvugizi wa Polisi mu ntara y’Amajyepfo, CIP Kamanzi Hassan yabwiye UMUSEKE ko amakuru y’ibanze avuga ko taliki ya 24/12/2025 yavuye aho yari yanywereye hanyuma aza gukubitwa n’umuntu bari basangiye, amukubita ibuye mu mutwe arakomereka, arakomeza aragenda nyuma aza gupfa.
Yagize ati: “Iperereza ryatangiye, Polisi iri gushakisha uriya muntu wamukomerekeje kandi ari bufatwe.”
Nyakwigendera ubusanzwe yakoraga akazi ko gucukura imicanga, akaba yari yaraturutse mu karere ka Nyamagabe gahana imbibi n’akarere ka Nyanza.
Polisi iributsa abaturage kwirinda ibikorwa by’urugomo, kuko nta cyiza cyabyo, ikindi ni icyaha gihanwa n’amategeko kandi bigira ingaruka ku wabikorewe, ndetse ni uwabikoze.
Polisi kandi yibutsa abaturage gutanga amakuru ku gihe, kuko iyo bimenyekana mbere ko nyakwigendera wabanje gukomereka yari kuvuzwa, ndetse n’uwamukomerekeje agafatwa ku gihe.
