Umuvugizi wa Guverinoma ya Repubulika Iharanira Demokarasi ya Congo, Patrick Muyaya Katembwe, yatangaje ko intambara yo mu burasirazuba bwa RDC ari akantu gato ku gihugu.
Umutekano wo mu Burasirazuba bwa RDC umaze imyaka myinshi warashegeshwe n’intambara z’urudaca, cyane cyane iz’imitwe yitwaje intwaro ibarirwa mu magana.
Iki kibazo cyafashe intera ndende mu Ugushyingo 2021 ubwo abarwanyi b’Umutwe wa M23 bafataga intwaro, basobanura ko Perezida Félix Tshisekedi yanze kubahiriza isezerano bagiranye ryo kwifatanya mu kugarura amahoro.
Ku wa 26 Ugushyingo 2025, Muyaya yabwiye abanyamakuru ko kubera intambara yo mu burasirazuba, abantu batekereza ko igihugu cyose kirimo intambara kandi ari igice gito irimo.
Yagize ati: “Iyo bigeze ku mahoro, sinshaka koroshya kibazo turi guhura na cyo kubera ko twese kitugiraho ingaruka, ariko se ni ijanisha ringana iki kuri kilometero kare 2.345.410?”
Jules Alingete wahoze ari Umugenzuzi Mukuru w’Imari wa RDC, muri Mata 2022 na we yatangaje ko intambara yo mu Burasirazuba bwa RDC nta ngaruka zikomeye yagize ku gihugu kubera ko ibera kure ya Kinshasa, mu bikometero 2000.
Yabivuze mu gihe intambara yari ikomeje gufata intera muri Teritwari ya Rutshuru mu Ntara ya Kivu y’Amajyaruguru, ingabo za RDC ziri gutsindwa buri uko habaye imirwano.
