APR FC yongeye gutombora Pyramids FC yo mu Misiri mu ijonjora ry’ibanze ry’Irushanwa rya CAF Champions League.
Ni tombola y’ijonjora ry’ibanze ry’imikino Nyafurika 2025-2026 yabereye muri Tanzania, yasize APR FC yongeye gutombora Pyramids FC yanatwaye igikombe cya Total Energies CAF Champions League 2024-2025 itsinze Mamelodi Sundowns yo muri Afurika y’Epfo
Pyramids FC yegukanye irushanwa ry’umwaka wa 2024/2025, yasezereye APR FC mu myaka ibiri iheruka.
Kuva mu mwaka w’imikino 2023-2024, APR FC na Pyramids FC zimaze guhura inshuro enye aho imikino ibiri ibanza yabereye Kigali yose amakipe yombi yayinganyije mu gihe Pyramids nayo yatsinze ibiri yo kwishyura yagiye ibera mu Misiri. Muri iyi mikino Pyramids FC yatsinzemo ibigego icumi(10) naho APR FC itsinda ibitego bitatu.
Imikino ibanza y’ijonjora ry’ibanze izakinwa hagati y’itariki 19-21 Nzeri aho APR FC ariyo izabana kwakira umukino ubanza naho iyo kwishyura ibe tariki ya 26-28 Nzeri 2025, Pyramids FC yakira umukino wo kwishyura.
Amakipe azagera mu ijonjora rya kabiri, azarikina hagati y’itariki 17-19 Ukwakira 2025 akina imikino ibanza, naho iyo kwishyura ikinwe tariki hagati ya 24-26 Ukwakira.
