FERWAFA yemeje ko yateye mpaga APR FC iyihanira kuba ku mukino w’umunsi wa 8 wa shampiyona wayihuje na Gorilla FC yarakinishije abanyamahanga (7) mu gihe batandatu Ari bo bemerewe kuba mu kibuga. Yanaciwe amade y’ibihumbi 100Frw.
Komisiyo ishinzwe amarushanwa yafashe umwanzuro kuri uyu wa gatatu, tariki ya 6 Ugushyingo 2024, ariko hirengagijwe amasaha 48 ateganywa mu ngingo ya 38.1 y’amategeko agenga amarushanwa ya FERWAFA.
Iyi Komisiyo yanzuye ko APR FC iterwa mpaga y’ibitego 3-0.
Ikipe y’Ingabo z’Igihugu yasigaranye amanota ane ku mwanya wa 15, irusha inota rimwe Kiyovu Sports ya nyuma. Gorilla FC yo yahise igira amanota 17 ku mwanya wa mbere.
APR FC izasubira mu kibuga ku wa kane aho izahura na Vision FC mu mukino w’umunsi wa cyenda wa Shampiyona mu gihe ku cyumweru, izakira Rutsiro FC mu kirarane cy’umunsi wa mbere wa shampiyona.
Amategeko agenga amarushanwa muri shampiyona y’icyiciro cya mbere, yavuguruwe ku wa 1 Nzeri 2024, ingingo ya 8.2 ivuga ko “Amakipe yo mu cyiciro cya mbere yemerewe gushyira ku rupapuro rw’umukino abakinnyi b’abanyamahanga batarenze 10 no gukinisha abakinnyi b’abanyamahanga batarenze batandatu mu kibuga.”
Ibi byatangiye kubahirizwa ku munsi wa gatatu wa shampiyona ndetse na APR FC yo ibikurikiza ihereye ku mukino yahuyemo na Etincelles FC ku wa 29 Nzeri, aba ari na ko bigenda ku mukino yakurikijeho wa Gasogi United ku wa 20 Ukwakira 2024.
