Abasirikare bo mu rwego rwo hejuru bo mu bihugu bihuriye mu mishinga yo kwishyira hamwe mu Muhora wa Ruguru NCIP (Northern Corridor Integration Projects), u Rwanda , Kenya , na Uganda bateraniye i Kigali mu nama yo gusuzumira hamwe uko imikoranire mu bya gisirikare ihagaze.
Biteganyijwe ko iyi nama izamara iminsi 2 yatangiye kuwa 5 Nzeri irasuzuma kandi uko ubufatanye mu bwirinzi buhagaze mu rwego rw’amasezerano y’ubufatanye mu bya gisirikare ibihugu bitatu byamaze gushyirwaho umukono.
Mu mishinga yemeranyijwe n’ibi bihugu bitatu igomba gusuzumirwa muri iyi nama, harimo ubufatanye mu gukumira, guhangana no gukemura imvururu n’amakimbirane, gukumira Jenoside, kurwanya iterabwoba, kurwanya no guhangana n’ubujura, ibijyanye n’ubufatanye mu bikorwa by’amahoro, guhangana no kugabanya ingaruka ziterwa n’ibiza.
Ibi bihugu kandi byanemeranyijwe indi mishinga irimo uko inzego za gisirikare zakwitwara mu bihe by’imvururu, gukurikirana no kurwanya ikwirakwizwa ry’intwaro nto n’inini mu buryo bunyuranyine n’amategeko, guhangana n’ibyaha byambukiranya imipaka, gukusanya no gusangizanya amakuru mu by’ubutasi hagamijwe kurwanya ibikorwa bibi bikorwa.
Mu izina rya Minisitiri w’ingabo, Brig Gen Celestin KANYAMAHANGA, umunyamabanga uhoraho wa Minisiteri y’Ingabo, yashimangiye akamaro k’inama avuga ko igaragaza imbogamizi n’intsinzi byagaragaye mu ishyirwa mu bikorwa ry’ibyemezo byafashwe mbere.
Yasabye kandi abitabiriye inama kugira uruhare rugaragara mu biganiro byifashisha ubumenyi mu gukemura ibibazo no guteza imbere uburyo rusange bugamije inyungu z’ibihugu bigize uyu muryango.
Abitabiriye iyi nama, bashimangiye ko imikoranire mu bikorwa bya gisirikare, ikenewe, byumwihariko mu myitozo ya gisirikare ihuriweho, mu gusangizanya amakuru y’ubutasi, mu bushakashatsi ndetse n’iterambere mu bijyanye n’igisirikare.