Kuri uyu wa gatatu tariki 3 Nyakanga 2024 abasirikare 32 bo mu ngabo za Repubulika Iharanira Demokarasi ya Congo (FARDC), batangiye kuburanishirizwa i Butembo mu ntara ya Kivu y’Amajyaruguru ku byaha baregwa birimo guhunga M23 ubwo bari bahanganye na yo mu mirwano yabereye muri tumwe mu duce imaze kwigarurira.
Abaregwa guhunga umwanzi bahanganye harimo bane b’igitsina gore nk’uko bitangazwa n’Umuvigizi w’ingabo za RDC mu gice cya Grand-Nord, Lieutenant Colonel Mack Hazukay.
Ni ibyaha bakoreye muri Teritwari ya Lubero, aho M23 iheruka gufata uduce dutandukanye turimo imijyi ya Kanyabayonga na Kirumba.
Umuvugizi wa Sosiyete sivile ikorera muri Lubero yavuze ko mu byo bariya basirikare basahuye harimo imodoka na za moto basanze ku muhanda uhuza Kanyabayonga na Butembo.
Aba 32 Ubushinjacyaha bwa gisirikare bubakurikiranyeho ibyaha birimo guhunga umwanzi, gusesagura amasasu ndetse no gusahura abaturage.
