DRC: Imirwano yabereye hafi y’ikigo cya gisirikare cya Rumangabo

Imirwano imaze icyumweru, imbunda zidaceceka muri Teritwari ya Rutshuru, ubu iravugwa hafi y’ikigo cya gisirikare cya Rumangabo.

Urukuta rwa Twitter Goma24, rukoreshwa n’inyeshyambaza za M23, ruvuga ko inyeshyamba zigenzura uduce twa Rugari ahitwa Ngiko, ndetse n’ishyamba rya Mwaro riherereye kuri Km 30 hafi y’Umujyi wa Goma.

Imirwano ngo irakomeje hagati y’ingabo za Leta, FARDC n’inyeshyamba mu nkengero za Rumangabo, nk’uko ruriya rubuga rubivuga.

Uru rubuga kandi ruvuga ko uduce twa Karambi muri Gurupema ya Busanza, ndetse n’uduce twa Mutabo, Nyalutemba, Kabingo, na Musezero na two twafashwe na M23.

Indi mirwano yabereye mu nkengero za Kitangoma, hafi y’umupaka wa Uganda.

Urubuga rwikira kuri Internet, globalinfos.net rwo muri Congo, na rwo ruvuga ko imirwano yakajije umurego kuri uyu wa Gatanu mu gitondo ikaba yabereye ku kigo cya gisirikare cya Rumangabo nk’uko kibikesha amakuru y’abari muri kariya gace.

Umwe mu bayobozi yemeje ko M23 yafashe ahitwa Karambi

Urubuga rwo muri Congo, rumwe mu zizewe, ACTUALITE.CD rwavuze ko imirwano yabereye ahitwa Busanza.

Rwavuze ko ubuyobozi bwo muri kariya gace bwemeje ko inyeshyamba za M23 zafashe agace ka Karambi.

Uwitwa Syllas Bangala uyobora agace ka Busanza, yabwiye ACTUALITE.CD ati “Kuva mu gitondo, habaye imirwano mu gace ka Karambi, ubu karagenzurwa na M23.”

Muri Video inyeshyamba za M23 zashyize kuri Twitter zigaragaza abasirikare zafatiye ku rugamba, harimo abemeza ko bakorana neza n’inyeshyamba za FDLR.

UMUSEKE.RW