Mu gusoza irushanwa rihuza amakipe y’abagore yabaye aya Mbere iwayo, CAF Women’s Champions League, ikipe yari ihagarariye u Rwanda, AS Kigali WFC yegukanye umwanya wa Kane udafite igihembo, mu gihe Simba Queens yo muri Ta ari yo yegukanye igikombe cya CAF Women’s Champions League mu Akarere ka CECAFA nyuma yo gutsinda She Corporate yo muri Uganda.
Tariki ya 27 Kanama 2022, ni bwo irushanwa ryahuzaga amakipe y’abagore yabaye aya Mbere iwayo.
Ni irushanwa ryaberaga muri Tanzania guhera tariki 15 Kanama 2022. AS Kigali WFC yari iherereye mu itsinda rya Mbere na Warriors Queens FC, Commercial Bank of Éthiopia yo muri Éthiopia na Fofila y’i Burundi.
Habanje umukino wo guhatanira umwanya wa Gatatu, wahuje AS Kigali WFC na Commercial Bank of Éthiopia, urangira iyi kipe y’i Kigali itsinzwe ibitego 4-1.
Hahise hakurikiraho umukino wa nyuma wahuje She Corporate na Simba Queens yo muri Tanzania. Amahirwe menshi yahabwaga ikipe yo muri Tanzania.
Ku munota wa 46 Vivian Corazone Aquino ni bwo yaboneye Simba Queens igitego cyanayihesheje kwegukana igikombe.
Nyuma yo kubona igitego, Simba Queens yakomeje kugicunga neza kugeza iminota 90 irangiye, yegukana igikombe gutyo.
AS Kigali WFC yari ihagarariye u Rwanda, yatahanye umwanya wa Kane nyuma yo gutsinda imikino ibiri y’amatsinda, igatsindwa umwe muri ayo matsinda, ikanatsindirwa muri 1/2 no ku guhatanira umwanya wa Gatatu.
Biteganyijwe ko kuri iki Cyumweru ari bwo itsinda ryose ry’abari bajyanye n’iyi kipe, rigera i Kigali. Usanase Zawadi atahanye ibitego bitanu mu mikino itanu ikipe ye yakinnye.
UMUSEKE.RW
